Ordiziarrock ia 20 urteko ibilbidea duen lantaldea gara, denborarekin eboluzionatu eta garaira egokitu dena.
Ordiziako musikarien lokal premiatik sortu zen, eta entseguetarako lekuak lortzeko baliabideak eskuratze aldera, emanaldiak antolatzen hasi ginen. Hor abiatu zen jaialdiaren antolaketa, eta ordutik zuzeneko emanaldiak izan dira gure erronka nagusia, bertako musika taldeei ikusgarritasuna ematea lehenetsiz.
Denborarekin, Ordiziarrockeko lantaldean, musikariak ez ezik, musikazaleak ere elkartu gara, eta guztion ikuspegiak eta gaitasunak uztartuta, proiektu berritzaileak, garaira egokituak, musikalki aberatsak, eta kalitate handikoak izan dira emaitza.
Ordiziarrockek urte osoan egiten du lan, kontzertuak antolatzen, kontzertuen antolaketan laguntzen, bestelako ekitaldietan musika txertatzen, aholkularitza musikal lana egiten…
Hori dena ez zen posible izango lantalde konprometitu zabal bat izango ez bagenu; zeren Ordiziarrock, zerbait bada, konpromisoa da, musikazaletasunak bultzatuta egiten baitugu dena, irabazi ekonomikoa lortzeko inongo asmorik gabe, irabazi guztiak musikan berrinbertitzen.
Norabidea argi dugu, musikariak eta zuzeneko emanaldiak dira ardatza, eta horri ekingo diogu beti.